دبئی ( شوبز ڈیسک) پاکستان کی معروف اداکارہ ماہرہ خان نے کہا ہے کہ وہ اپنی زندگی کے موجودہ مرحلے سے بھرپور لطف اندوز ہو رہی ہیں اور انہیں اس بات کی کوئی فکر نہیں کہ ایک وقت ایسا بھی آئے گا جب انہیں بطور ہیروئن کردار ملنا بند ہو جائیں گے۔دبئی میں منعقدہ ایک ادبی و ثقافتی تقریب کے دوران ’’کہانی سے کردار تک‘‘ کے عنوان سے ہونے والی خصوصی نشست میں گفتگو کرتے ہوئے انہوں نے مختلف موضوعات پر اظہارِ خیال کیا۔ماہرہ خان نے کہا کہ انہیں کامیابی اور مداحوں کی محبت دونوں بہت عزیز ہیں اور وہ اپنے مداحوں کے ساتھ تعلق کو انتہائی اہم سمجھتی ہیں۔ ان کے مطابق لوگوں کی جانب سے ملنے والی محبت خوشی کا باعث ہے، تاہم وہ یہ بھی جانتی ہیں کہ شہرت اور کامیابی ہمیشہ برقرار نہیں رہتیں، اسی لیے ان کی مکمل توجہ اپنے کام پر رہتی ہے۔اداکارہ نے اعتماد کے ساتھ کہا کہ وہ اپنی موجودہ عمر اور زندگی کے اس مرحلے سے بہت مطمئن ہیں اور انہیں اس بات کی فکر نہیں کہ مستقبل میں ہیروئن کے کردار کم ہو جائیں گے۔ ان کے مطابق وہ اس حقیقت کو قبول کرتی ہیں کہ یہ وقت قریب آ سکتا ہے۔انہوں نے ہدایت کاروں اور پروڈیوسرز سے اپیل کی کہ انہیں روایتی ہیروئن کے کرداروں تک محدود نہ رکھا جائے بلکہ مختلف اور منفرد کرداروں میں کاسٹ کیا جائے تاکہ وہ اپنی اداکاری کے مزید پہلو ناظرین کے سامنے پیش کر سکیں۔
