15 صوبے بنانے کا حکومتی فیصلہ غلط، آئین کا مذاق بنایا جا رہا ہے: مولانا فضل الرحمان

خانیوال( پاکستان خبر) جمعیت علمائے اسلام (ف) کے سربراہ مولانا فضل الرحمان نے وفاقی حکومت کو تنقید کا نشانہ بناتے ہوئے کہا ہے کہ ملک میں 15 صوبے بنانے کا فیصلہ درست نہیں، جبکہ حکومت پاکستان کے آئین کا مذاق بنا رہی ہے،خانیوال میں جے یو آئی (ف) کے رہنما علامہ اکرام القادری کی عیادت کے بعد میڈیا سے گفتگو کرتے ہوئے مولانا فضل الرحمان نے کہا کہ ملک کے آئین کے ساتھ سنجیدہ رویہ اختیار کرنے کے بجائے اسے مذاق بنا دیا گیا ہے۔انہوں نے کہا کہ ملک کے دو صوبے پہلے ہی بدامنی اور مسائل کا شکار ہیں، لیکن حکومت نئے صوبے بنانے کی بات کر رہی ہے۔ ان کے مطابق حکومت عوام کا اعتماد مکمل طور پر کھو چکی ہے۔مولانا فضل الرحمان نے کہا کہ 15 صوبے بنانے کا حکومتی فیصلہ غلط ہے، جبکہ اس سے قبل قبائلی اضلاع کو صوبہ خیبر پختونخوا میں ضم کرنے کا فیصلہ بھی انتہائی نقصان دہ ثابت ہوا ہے۔انہوں نے مزید کہا کہ جمعیت علمائے اسلام (ف) پاکستان پیپلز پارٹی اور پاکستان تحریک انصاف سے بات چیت کر رہی ہے اور اسمبلی میں مشترکہ حکمت عملی طے کی جائے گی۔