وفاقی حکومت کا ریلیف پر مبنی بجٹ، معاشی استحکام اور ٹیکس اصلاحات پر زور

اسلام آباد(پاکستان خبر) اسلام آباد میں وفاقی وزیر اطلاعات و نشریات عطا اللہ تارڑ نے کہا ہے کہ مشکل معاشی حالات کے باوجود حکومت نے ریلیف پر مبنی بجٹ پیش کیا ہے اور ٹیکس نہ دینے والے افراد کا بوجھ ٹیکس دینے والوں پر نہیں ڈالا گیا۔وزیر مملکت برائے خزانہ بلال اظہر کیانی کے ہمراہ پریس کانفرنس سے خطاب کرتے ہوئے انہوں نے کہا کہ حکومت نے مشکل فیصلوں کے ذریعے معیشت کو سہارا دیا اور ملک کو درپیش مالی چیلنجز سے نمٹنے کی کوشش کی گئی۔عطا اللہ تارڑ کے مطابق گزشتہ دو برسوں میں معاشی استحکام کے لیے اقدامات کیے گئے، جبکہ سوشل میڈیا سے وابستہ افراد کو بجٹ پر بریفنگ دینا اس لیے ضروری تھا تاکہ حکومتی پالیسیوں کو درست انداز میں عوام تک پہنچایا جا سکے۔انہوں نے کہا کہ مختلف شعبوں میں کرپشن کی روک تھام کے اقدامات کیے گئے ہیں اور محصولات کی وصولی میں بہتری آئی ہے، جبکہ شوگر سیکٹر سے بھی اربوں روپے ٹیکس وصول کیا گیا ہے۔وزیر اطلاعات نے بتایا کہ 50 ہزار روپے سے کم آمدن والے افراد کو ٹیکس سے استثنیٰ دیا گیا ہے جبکہ ایک لاکھ روپے تک آمدن پر صرف ایک فیصد ٹیکس عائد ہوگا۔اس موقع پر وزیر مملکت برائے خزانہ بلال اظہر کیانی نے کہا کہ یہ بجٹ صنعتکاروں، برآمد کنندگان، خواتین اور نوجوانوں کے لیے ریلیف کا حامل ہے۔ انہوں نے بتایا کہ وزیراعظم یوتھ پیکیج اور زرعی قرضوں کے لیے بھی خطیر رقم مختص کی گئی ہے۔انہوں نے مزید کہا کہ حکومت پائیدار معاشی استحکام کے لیے کوشاں ہے اور بجٹ میں کاروباری طبقے کو سہولتیں فراہم کرنے کے ساتھ ٹیکس نیٹ کو وسعت دینے پر بھی توجہ دی گئی ہے۔