لاہور( سپورٹس ڈیسک) عالمی فٹبال کی تنظیم فیفا کے صدر گیانی انفنٹینو نے پاکستان میں فٹبال کے فروغ کے لیے پاکستان فٹبال فیڈریشن (پی ایف ایف) کے صدر سید محسن گیلانی کی کوششوں کو سراہا ہے۔گیانی انفنٹینو نے فوٹو اور ویڈیو شیئرنگ پلیٹ فارم انسٹاگرام پر سید محسن گیلانی کے ساتھ ملاقات کی تصویر شیئر کرتے ہوئے بتایا کہ ان کی پاکستان فٹبال فیڈریشن کے صدر سے ملاقات ہوئی۔فیفا صدر کے مطابق ملاقات میں فٹبال کے حوالے سے آئندہ باہمی تعاون جاری رکھنے کے طریقوں پر گفتگو ہوئی تاکہ پاکستان کے نوجوانوں کو اس کھیل سے لطف اندوز ہونے کے مزید مواقع فراہم کیے جا سکیں۔گیانی انفنٹینو نے کہا کہ سید محسن گیلانی کا وژن متاثر کن ہے، جبکہ ملاقات کے دوران انہیں پاکستان میں فٹبال سے متعلق منصوبوں کی تازہ صورتِ حال سے بھی آگاہ کیا گیا۔انہوں نے بتایا کہ فیفا نے پاکستان فٹبال فیڈریشن کے فٹبال کی ترقی سے متعلق منصوبوں کی حمایت جاری رکھنے کا وعدہ کیا ہے۔فیفا صدر نے سید محسن گیلانی اور پاکستان فٹبال فیڈریشن کا شکریہ ادا کرتے ہوئے ٹیم کی ’فیفا آسیان کپ 2026ء‘ اور ’فیفا انڈر 15 ورلڈ کپ اینڈ فیسٹیول 2026ء‘ میں کامیابی کے لیے نیک تمناؤں کا اظہار بھی کیا۔
