ممبئی( شو بز ڈیسک)بھارتی فلم انڈسٹری میں متنازع فلم ’کالا ہرن‘ کے حوالے سے نیا قانونی تنازع سامنے آ گیا ہے، جس میں پروڈیوسر امیت جانی نے سینئر اداکار گووند نام دیو کو قانونی نوٹس جاری کر دیا ہے۔بھارتی میڈیا کے مطابق نوٹس میں مطالبہ کیا گیا ہے کہ اداکار 7 دن کے اندر عوامی طور پر معافی مانگیں اور پروڈکشن ہاؤس کو 50 لاکھ روپے ہرجانہ ادا کریں، بصورت دیگر ان کے خلاف قانونی کارروائی کی جائے گی۔رپورٹس کے مطابق تنازع اس وقت شروع ہوا جب گووند نام دیو نے فلم کا ٹیزر دیکھنے کے بعد کہا کہ انہیں فلم کی اصل کہانی سے لاعلم رکھا گیا تھا اور حتمی فلم ان کے ابتدائی تصور سے مختلف ہے۔اداکار کے مطابق انہیں بتایا گیا تھا کہ فلم کا نام ’سنبھل‘ ہوگا اور ان کا کردار صرف عدالتی مناظر تک محدود رہے گا، تاہم بعد میں کہانی میں تبدیلیاں سامنے آئیں۔دوسری جانب پروڈیوسر امیت جانی کا مؤقف ہے کہ گووند نام دیو مکمل آگاہی کے ساتھ اس پراجیکٹ کا حصہ بنے تھے اور وہ اس کے سیکوئل میں بھی کام کرنے پر رضامند تھے۔ادھر بالی ووڈ اداکار سلمان خان نے بھی معاملے پر دہلی ہائی کورٹ سے رجوع کرتے ہوئے فلم کی نمائش پر پابندی کی درخواست دائر کر رکھی ہے۔درخواست میں مؤقف اختیار کیا گیا ہے کہ فلم ان کی شخصیت سے منسوب الزامات پر مبنی ہے اور ان کے ذاتی حقوق کی خلاف ورزی کرتی ہے۔ کیس کی سماعت 19 جون کو متوقع ہے۔
