لاہور (سپورٹس ڈیسک) ارجنٹینا کے لیجنڈری فٹبالر لیونل میسی نے قومی ٹیم کے لیے آخری میچ سے قبل خصوصی جرسی کی پہلی جھلک مداحوں کے ساتھ شیئر کردی۔39 سالہ میسی نے سماجی رابطے کی ویب سائٹ پر ایڈیڈاس کی تیار کردہ خصوصی ارجنٹینا جرسی کی تصویر شیئر کرتے ہوئے لکھا، ’’ایک آخری میچ، زندگی بھر کے لیے ایک جرسی۔‘‘ارجنٹینا کی روایتی آسمانی اور سفید رنگوں والی جرسی میں میسی کے الوداع کو یادگار بنانے کے لیے خصوصی ڈیزائن شامل کیے گئے ہیں۔ جرسی کی پشت پر ’’میسی‘‘ اور نمبر ’’10‘‘ سنہری رنگ میں درج ہے جبکہ نام کے اوپر ارجنٹینا کے پرچم میں موجود ’’سن آف مئی‘‘ کا نشان بھی بنایا گیا ہے۔میسی 6 اکتوبر کو بیونس آئرس کے مونومینٹل اسٹیڈیم میں بینن کے خلاف ارجنٹینا کی جانب سے اپنا آخری میچ کھیلیں گے، جو ان کے بین الاقوامی فٹبال سے الوداع کے طور پر منعقد کیا جا رہا ہے۔میسی نے ارجنٹینا کی جانب سے اب تک 207 میچز میں 125 گول کیے ہیں۔ وہ بولیویا اور برکینا فاسو کے خلاف اس سے قبل ہونے والے دوستانہ میچز میں شرکت نہیں کریں گے، اس لیے بینن کے خلاف مقابلہ ان کا 208واں اور آخری بین الاقوامی میچ ہوگا۔
