کیلیفورنیا( ویب ڈیسک) ٹیکنالوجی کمپنی ایپل کے پہلے فولڈ ایبل آئی فون کی متوقع لانچ اور دستیابی میں تاخیر کا امکان ظاہر کیا جا رہا ہے، جس کی بنیادی وجہ سپلائی چین سے متعلق مسائل بتائے جا رہے ہیں۔غیر ملکی میڈیا رپورٹس کے مطابق ایپل رواں سال ستمبر میں اپنے پہلے فولڈ ایبل آئی فون کی رونمائی کر سکتا ہے، تاہم محدود پیداوار کے باعث یہ ڈیوائس زیادہ تر صارفین کو 2027 تک دستیاب نہ ہونے کا خدشہ ظاہر کیا جا رہا ہے۔رپورٹس میں دعویٰ کیا گیا ہے کہ ممکنہ طور پر آئی فون الٹرا کے نام سے متعارف کرائے جانے والے اس فون میں 5.5 انچ کی بیرونی اسکرین جبکہ فولڈ کھولنے پر 7.8 انچ کی بڑی ڈسپلے دی جائے گی۔ذرائع کے مطابق اس فولڈ ایبل آئی فون کی متوقع قیمت 2300 سے 2500 امریکی ڈالر کے درمیان ہو سکتی ہے، جس کے بعد یہ ایپل کی تاریخ کا سب سے مہنگا آئی فون بن جائے گا۔معروف صنعتی تجزیہ کار منگ چی کوو کے مطابق سپلائی چین میں محدود اسٹاک کی وجہ سے ایپل ستمبر میں اس ڈیوائس کا اعلان تو کر سکتا ہے، تاہم اس کی پری آرڈر بکنگ اور باقاعدہ فروخت کچھ عرصے بعد شروع کیے جانے کا امکان ہے۔انہوں نے کہا کہ فولڈ ایبل آئی فون کی صورتحال 2017 میں متعارف کرائے گئے آئی فون ایکس سے ملتی جلتی ہو سکتی ہے، جس کا اعلان مقررہ وقت پر کیا گیا تھا، لیکن اس کی فروخت بعد میں شروع کی گئی تھی۔واضح رہے کہ ایپل نے اب تک فولڈ ایبل آئی فون کی لانچ، نام، قیمت یا تکنیکی خصوصیات کے بارے میں کوئی باضابطہ اعلان نہیں کیا، اس لیے مذکورہ تمام معلومات غیر مصدقہ رپورٹس اور تجزیہ کاروں کی پیش گوئیوں پر مبنی ہیں۔
