کراچی ( شو بز ڈیسک) اداکار احد رضا میر اور اداکارہ مایا علی ایک مرتبہ پھر سوشل میڈیا صارفین کی توجہ کا مرکز بن گئے ہیں، جہاں دونوں کے درمیان ممکنہ تعلق سے متعلق قیاس آرائیاں کی جارہی ہیں۔دونوں اداکار حال ہی میں ڈرامہ ’’ایک محبت اور‘‘ میں ایک ساتھ نظر آئے تھے، جس میں ان کی جوڑی اور اداکاری کو ناظرین کی جانب سے پسند کیا گیا۔احد رضا میر کی سالگرہ کی تصاویر سامنے آنے کے بعد مداحوں نے ان کے اور مایا علی کے تعلق کے بارے میں نئی باتیں شروع کردیں۔ سالگرہ کی تصاویر میں مایا علی کے ساتھ احد کی ایک تصویر بھی شامل تھی، جو مایا علی ڈرامے کے اختتام پر پہلے ہی اپنی پوسٹ میں شیئر کرچکی تھیں۔سوشل میڈیا صارفین نے یہ بھی توجہ دلائی کہ احد رضا میر کی والدہ اور مایا علی ایک دوسرے کو سماجی رابطے کی ویب سائٹ پر فالو کرتی ہیں۔ اس بات کو بنیاد بنا کر مداح دونوں اداکاروں کے ممکنہ تعلق سے متعلق مختلف اندازے لگا رہے ہیں۔تاہم احد رضا میر اور مایا علی دونوں میں سے کسی نے بھی ان قیاس آرائیوں کی تاحال تصدیق نہیں کی۔
