گورو کھنہ کی ازدواجی صورتحال پر خاموشی ٹوٹی، اہلیہ کے لیے محبت کا اظہار

ممبئی( شو بز ڈیسک)اداکار اور بگ باس 19 کے فاتح گورو کھنہ نے اپنی اہلیہ آکانکشا چمولا کی جانب سے علیحدگی اور طلاق سے متعلق بیان کے بعد پہلی بار اپنی خاموشی توڑ دی ہے۔آکانکشا چمولا نے لاک اپ سیزن 2 میں شرکت سے قبل انکشاف کیا تھا کہ وہ اور گورو گزشتہ ایک سال سے زائد عرصے سے الگ رہ رہے ہیں اور دونوں کے درمیان طلاق کا عمل جاری ہے، جس کے بعد سوشل میڈیا پر مختلف قیاس آرائیاں شروع ہو گئیں۔حال ہی میں گورو کھنہ کو ایک ریئلٹی شو کے سیٹ کے باہر میڈیا نے گھیر لیا، جہاں ان سے ان کی ذاتی زندگی سے متعلق سوالات کیے گئے۔اداکار نے کہا کہ ان کے جذبات میں کوئی تبدیلی نہیں آئی اور وہ آج بھی آکانکشا سے اتنی ہی محبت کرتے ہیں جتنی پہلے کرتے تھے۔انہوں نے مزید کہا کہ وہ ہمیشہ اپنی اہلیہ کا ساتھ دیں گے اور چاہتے ہیں کہ وہ اپنے ریئلٹی شو میں بہترین کارکردگی دکھائیں اور کامیاب ہوں۔آکانکشا کے بیان کے بعد مداحوں کی جانب سے ان کے تعلق کی ٹائم لائن پر بھی سوالات اٹھائے جا رہے ہیں، کیونکہ رواں سال کے آغاز میں دونوں نے سوشل میڈیا پر ایک ساتھ رومانوی تصاویر اور ویڈیوز بھی شیئر کی تھیں۔تاہم گورو کھنہ کے حالیہ بیان کے بعد ایک بار پھر ان کے تعلقات کے حوالے سے بحث اور قیاس آرائیاں جاری ہیں۔