تل ابیب (شوبز ڈیسک) غزہ جنگ پر بنائی گئی اسرائیلی دستاویزی فلم ’’نازا‘‘ کو وینس فلم فیسٹیول میں ایوارڈ ملنے کے بعد اسرائیل میں شدید تنازع کھڑا ہوگیا۔فلم کو تنقید کا نشانہ بناتے ہوئے وینس فلم فیسٹیول میں اعزاز ملنے کو حیران کن قرار دیا گیا۔ ناقدین نے الزام عائد کیا کہ فلمسازوں نے عالمی پذیرائی حاصل کرنے کیلئے اپنے ہی ملک کو نقصان پہنچایا اور ان کے اقدام کو ریاست سے غداری قرار دیا۔اسرائیلی وزیر ثقافت نے کہا ہے کہ وہ بطور وزیر دونوں فلمسازوں کی شہریت منسوخ کرنے کیلئے فوری کارروائی کریں گے۔تاہم رپورٹ کے مطابق ابھی فلمسازوں کی شہریت منسوخ نہیں کی گئی بلکہ وزیر کی جانب سے کارروائی شروع کرنے کا اعلان سامنے آیا ہے۔دستاویزی فلم میں اسرائیلی فوج کی کارروائیوں اور شہریوں کی ہلاکتوں سے متعلق سنگین الزامات پیش کیے گئے ہیں۔ فلم میں اسرائیلی فوج سے وابستہ افراد کے انٹرویوز بھی شامل ہیں اور یہ سوال اٹھایا گیا ہے کہ فوجی کارروائیوں کے دوران شہریوں کو ممکنہ جانی نقصان پہنچنے کو کس طرح قابل قبول سمجھا جاتا تھا۔
