جرمن( ویب ڈیسک)جرمنی کی نجی خلائی کمپنی اسار ایرو اسپیس نے یورپی سرزمین سے اپنا خلائی راکٹ کامیابی کے ساتھ مدار میں پہنچا کر تاریخ رقم کردی۔کمپنی کا اسپیکٹرم راکٹ ناروے میں واقع آندویا خلائی مرکز سے خلا کی جانب روانہ کیا گیا اور کامیابی سے مدار میں داخل ہوگیا۔جرمن کمپنی نے سماجی رابطے کی ویب سائٹ ایکس پر کامیابی کا اعلان کرتے ہوئے کہا کہ راکٹ مدار تک پہنچ چکا ہے۔ کمپنی کے مطابق یورپ سے نجی طور پر تیار کیے گئے راکٹ کی پہلی کامیاب مداری پرواز کے ذریعے تاریخ رقم ہوئی ہے۔جرمن وزارتِ تحقیق، ٹیکنالوجی اور خلائی امور نے بھی کامیابی کو سراہتے ہوئے کہا کہ جرمنی خلائی پرواز کی صلاحیت رکھتا ہے۔وزارت کے مطابق یہ پیش رفت جرمنی کی جدت، تکنیکی مہارت اور خلائی شعبے میں بڑھتی ہوئی استعداد کا اہم ثبوت ہے۔اسپیکٹرم راکٹ کو خلا میں پہنچانے کی یہ دوسری کوشش تھی۔ تقریباً 18 ماہ قبل کمپنی نے پہلی مرتبہ راکٹ روانہ کرنے کی کوشش کی تھی، تاہم وہ مشن کامیاب نہیں ہوسکا تھا۔اس کامیابی کے بعد جرمنی کی نجی خلائی صنعت نے یورپی خلائی شعبے میں ایک اہم سنگِ میل عبور کرلیا ہے۔ یہ پیش رفت مستقبل میں یورپی سرزمین سے نجی راکٹوں کی پروازوں کی راہ ہموار کرسکتی ہے۔
