ہیوسٹن ( سپورٹس ڈیسک) فیفا عالمی کپ 2026 میں جرمنی نے اپنی مہم کا شاندار آغاز کرتے ہوئے گروپ ای کے پہلے میچ میں پہلی بار عالمی کپ میں شرکت کرنے والی ٹیم کیوراساؤ کو ایک کے مقابلے میں سات گول سے شکست دے دی۔جرمنی نے میچ کے آغاز سے ہی جارحانہ کھیل پیش کیا اور چھٹے منٹ میں فیلکس نمیچا نے خوبصورت شاٹ کے ذریعے گول کر کے اپنی ٹیم کو برتری دلا دی۔تاہم ابتدائی پندرہ منٹ کے بعد کیوراساؤ نے اعتماد کے ساتھ کھیل کا آغاز کیا اور مضبوط ٹیکلنگ اور تیز پاسنگ کے ذریعے جرمن مڈفیلڈ پر دباؤ بڑھایا۔کیوراساؤ کی کوششیں 21ویں منٹ میں رنگ لائیں جب لیوانو کومینینسیا نے گول کر کے مقابلہ ایک ایک سے برابر کر دیا، جو ان کی ٹیم کا عالمی کپ تاریخ میں پہلا گول بھی تھا۔جرمنی نے 38ویں منٹ میں نیکو شلوٹربیک کے شاندار فنش کے ذریعے دوبارہ برتری حاصل کی اور اسکور دو ایک کر دیا۔پہلے ہاف کے اضافی وقت میں جرمنی کو پینلٹی ملی جس پر کائی ہاورٹز نے گول کر کے اسکور ایک کے مقابلے میں تین کر دیا۔دوسرے ہاف میں جرمنی نے اپنی برتری برقرار رکھی اور 47ویں منٹ میں جمال موسیالا نے گول کر کے اسکور ایک کے مقابلے میں چار کر دیا۔68ویں منٹ میں ناتھنئیل براؤن نے اپنے عالمی کپ کیریئر کا پہلا گول اسکور کیا اور جرمنی کی برتری ایک کے مقابلے میں پانچ ہو گئی۔78ویں منٹ میں ڈینیز اونداؤ نے چھٹا گول کیا جبکہ 88ویں منٹ میں کائی ہاورٹز نے اپنا دوسرا اور ٹیم کا ساتواں گول اسکور کر کے مقابلہ ایک کے مقابلے میں سات کر دیا۔اضافی وقت کے بعد میچ اختتام پذیر ہوا اور جرمنی نے ٹورنامنٹ میں ایک بڑی اور شاندار فتح اپنے نام کر لی۔
