لندن( کامرس ڈیسک) امریکا اور ایران کے درمیان بڑھتی ہوئی کشیدگی اور آبنائے ہرمز کے ذریعے توانائی کی ترسیل میں رکاوٹ کے خدشات کے باعث عالمی منڈی میں خام تیل کی قیمتوں میں 3 فیصد سے زائد اضافہ ریکارڈ کیا گیا ہے۔رپورٹس کے مطابق برینٹ خام تیل کی قیمت میں 2.75 ڈالر کا اضافہ ہوا، جس کے بعد یہ 3.12 فیصد اضافے کے ساتھ 90.85 ڈالر فی بیرل تک پہنچ گئی۔اسی طرح امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کی قیمت بھی 2.56 ڈالر اضافے کے بعد 3.10 فیصد بڑھ کر 85.05 ڈالر فی بیرل ہوگئی۔ماہرین کے مطابق دنیا بھر میں خام تیل اور مائع قدرتی گیس (ایل این جی) کی تقریباً 20 فیصد ترسیل آبنائے ہرمز کے راستے ہوتی ہے، اس لیے موجودہ صورتحال کے باعث عالمی سپلائی، بحری بیمہ اخراجات اور توانائی کی منڈی میں غیر یقینی صورتحال مزید بڑھنے کا خدشہ ہے۔
