کراچی( شوبز ڈیسک) پاکستانی اداکار گوہر رشید نے حالیہ پوڈکاسٹ میں عورت مارچ کے بعض پوسٹرز اور نعروں کے انداز پر اپنی رائے کا اظہار کرتے ہوئے کہا ہے کہ خواتین کے حقوق کے لیے آواز اٹھانا ضروری ہے، تاہم اس کا طریقہ مہذب اور مناسب ہونا چاہیے۔گوہر رشید کا کہنا تھا کہ خواتین کو کسی بھی صورت میں صرف جنس کی بنیاد پر پیش نہیں کیا جانا چاہیے۔ انہوں نے کہا کہ اسی سوچ کے باعث وہ فلموں میں آئٹم نمبرز کے بھی مخالف ہیں، کیونکہ ایسے گانے خواتین کو محض ایک چیز کے طور پر دکھانے کا تاثر دیتے ہیں۔اداکار نے عورت مارچ میں استعمال ہونے والے بعض پوسٹرز پر تنقید کرتے ہوئے کہا کہ اپنا مؤقف زیادہ شائستہ، مثبت اور مؤثر انداز میں بھی پیش کیا جا سکتا ہے۔گوہر رشید کے بیان کے بعد سوشل میڈیا پر مختلف ردعمل سامنے آئے۔ کچھ صارفین نے ان کے مؤقف کی حمایت کرتے ہوئے کہا کہ بعض نعروں اور پوسٹرز کے انداز پر اعتراض کیا جا سکتا ہے، جبکہ کئی افراد نے ان کی رائے سے اختلاف بھی کیا۔
