نیویارک( ویب ڈیسک) اسمارٹ فون استعمال کرنے والے گوگل میپس صارفین کے لیے ایک نیا اور دلچسپ فیچر متعارف کرایا گیا ہے۔گوگل میپس میں اسٹریٹ ویو سروس کی 15ویں سالگرہ کے موقع پر ایک اہم اپڈیٹ جاری کی گئی ہے، جس کے تحت اب پرانی اسٹریٹ ویو تصاویر موبائل ایپ کا حصہ بنائی جا رہی ہیں۔کمپنی کے مطابق یہ فیچر پہلے صرف کمپیوٹرز پر دستیاب تھا، تاہم بڑھتے ہوئے موبائل استعمال کو مدنظر رکھتے ہوئے اسے اب اینڈرائیڈ اور آئی او ایس ایپس میں بھی شامل کر دیا گیا ہے۔اس نئے فیچر کے ذریعے صارفین یہ دیکھ سکیں گے کہ مختلف مقامات، سڑکیں اور علاقے ماضی میں کیسے نظر آتے تھے۔ اس کے لیے صارفین کو اسٹریٹ ویو تصویر پر کلک کر کے مخصوص آپشن منتخب کرنا ہوگا، جس کے بعد دستیاب پرانی تصاویر دیکھی جا سکیں گی۔یہ سہولت ہر علاقے میں دستیاب نہیں ہوگی بلکہ اس کا انحصار اس بات پر ہوگا کہ متعلقہ مقام کی پرانی تصاویر گوگل کے پاس موجود ہیں یا نہیں۔یہ نیا فیچر صارفین کو اپنے اردگرد کی تبدیلیوں کو وقت کے ساتھ دیکھنے کا ایک دلچسپ اور معلوماتی موقع فراہم کرتا ہے۔
