سیالکوٹ ( ویب ڈیسک) وفاقی وزیر برائے انفارمیشن ٹیکنالوجی شزا فاطمہ خواجہ نے کہا ہے کہ حکومت کا بنیادی مقصد کاروباری اداروں اور مختلف شعبوں کو جدید ٹیکنالوجی کی معاونت فراہم کرنا ہے۔ایک تقریب سے خطاب کرتے ہوئے انہوں نے کہا کہ نیشنل انکیوبیشن سینٹرز کے ذریعے اسٹارٹ اپس اور صنعتی شعبے کو مضبوط بنانے کے لیے مؤثر اقدامات کیے جا رہے ہیں، جبکہ بعض مراکز نے نمایاں مالی کامیابیاں بھی حاصل کی ہیں۔وفاقی وزیر نے کہا کہ پاکستان کی مجموعی برآمدات کا بڑا حصہ سیالکوٹ سے آتا ہے، جو ملک کی ایک انتہائی متحرک صنعتی منڈی ہے۔ انہوں نے کہا کہ موجودہ دور میں مصنوعی ذہانت اور جدید ٹیکنالوجی کے ذریعے عالمی آٹو انڈسٹری کے ساتھ مقابلہ کرنا ایک اہم چیلنج ہے۔انہوں نے اس بات پر زور دیا کہ حکومت کا مقصد صنعتوں کو درپیش مسائل کے حل کے لیے ٹیکنالوجی پر مبنی سہولتیں فراہم کرنا ہے تاکہ پیداواری صلاحیت میں اضافہ ہو اور معیشت کو فروغ ملے۔شزا فاطمہ خواجہ کے مطابق نیشنل انکیوبیشن سینٹرز کو صنعتوں کی ضروریات کو مدنظر رکھتے ہوئے اپنی خدمات مزید مؤثر بنانی چاہییں تاکہ کاروباری شعبہ جدید تقاضوں سے ہم آہنگ ہو سکے۔
