حریم فاروق رجب بٹ کی حمایت میں سامنے آگئیں، فلم سازی کی حوصلہ افزائی پر زور

کراچی( شو بز ڈیسک) پاکستانی اداکارہ اور پروڈیوسر حریم فاروق نے فلم بنانے کے خواہش مند افراد کی حوصلہ افزائی کرتے ہوئے کہا ہے کہ فلم سازی مشکل ضرور ہے، تاہم اسے ناممکن نہیں سمجھنا چاہیے۔ایک حالیہ انٹرویو میں حریم فاروق سے یوٹیوبر رجب بٹ کے فلمی دنیا میں آنے کے فیصلے پر ہونے والی تنقید اور سوشل میڈیا پر کی جانے والی ٹرولنگ کے بارے میں سوال کیا گیا۔حریم فاروق نے اس تنقید کو غیر اہم قرار دیتے ہوئے کہا کہ ایسی باتوں سے کوئی فرق نہیں پڑتا۔ ان کے مطابق لوگوں کو فلم بنانے کی کوشش کرنے سے روکنے کے بجائے ان کی حوصلہ افزائی کرنی چاہیے۔اداکارہ کا کہنا تھا کہ جو بھی فلم سازی کے شعبے میں قدم رکھنا چاہتا ہے، اسے آگے بڑھنے کا موقع اور ترغیب ملنی چاہیے۔ تاہم فلم بنانے والوں کو ناظرین کے حوالے سے اپنی ذمہ داری کا احساس بھی کرنا چاہیے۔حریم فاروق نے اس بات پر زور دیا کہ فلم سازوں کی توجہ معیاری فلمیں بنانے پر ہونی چاہیے، تاکہ ناظرین انہیں پسند کریں اور پاکستانی سنیما عالمی سطح پر بھی اپنی پہچان بنا سکے۔ان کا یہ بیان ایسے وقت میں سامنے آیا ہے جب رجب بٹ ہدایت کار سید فیصل بخاری کی فلم کے ذریعے بڑے پردے پر اپنی اداکاری کا آغاز کرنے کی تیاری کر رہے ہیں۔ اس فلم میں اداکارہ امر خان مرکزی کردار ادا کر رہی ہیں، جبکہ دیگر تجربہ کار فنکار بھی اس منصوبے کا حصہ ہیں۔