لاہور( سپورٹس ڈیسک) قومی کرکٹ ٹیم کے فاسٹ بولر حارث رؤف نے آئندہ ماہ شروع ہونے والی تین ملکی سیریز کی تیاریوں پر توجہ مرکوز کرلی ہے۔پریزیڈنٹ ٹرافی گریڈ ون میں پاکستان ٹیلی وژن کی نمائندگی کرنے والے حارث رؤف نے پاکستان کرکٹ بورڈ سے گفتگو کرتے ہوئے کہا کہ چار روزہ کرکٹ میں شرکت سے انہیں آئندہ بین الاقوامی سیریز کیلئے تیاری کا اچھا موقع مل رہا ہے۔فاسٹ بولر کا کہنا تھا کہ ڈومیسٹک کرکٹ میں کھیلتے ہوئے وہ اپنی کارکردگی بہتر بنانے اور مطلوبہ ردھم حاصل کرنے کی کوشش کر رہے ہیں تاکہ اگلی بین الاقوامی سیریز میں بھرپور کارکردگی دکھائی جاسکے۔حارث رؤف نے کہا کہ اس مرحلے پر ان کا بنیادی ہدف زیادہ وکٹیں حاصل کرنا ہے، جبکہ چار روزہ کرکٹ فاسٹ بولرز کیلئے خاص اہمیت رکھتی ہے کیونکہ اس میں وہ اپنی گیند کی لائن اور لینتھ پر بھرپور کام کرسکتے ہیں۔واضح رہے کہ پاکستان، انگلینڈ اور سری لنکا کے درمیان تین ملکی سیریز کا آغاز آئندہ ماہ راولپنڈی کرکٹ اسٹیڈیم سے ہوگا، جبکہ سیریز کے بعض مقابلے قذافی اسٹیڈیم میں بھی کھیلے جائیں گے۔سیریز سے قبل انگلینڈ کرکٹ بورڈ کا سیکیورٹی وفد پاکستان کا دورہ کرچکا ہے۔ وفد کے مطابق انگلش ٹیم پاکستان آکر کھیلنے کیلئے پُرجوش ہے، جبکہ پاکستانی شائقین کرکٹ سے گہری محبت رکھتے ہیں۔
