لاہور( سپورٹس ڈیسک) پاکستان سپر لیگ (پی ایس ایل) کو سال بھر متحرک رکھنے اور اس کی مقبولیت میں مزید اضافے کے لیے منتظمین ایک نئے ٹورنامنٹ کے انعقاد پر غور کر رہے ہیں، جس میں چھ کھلاڑیوں پر مشتمل کرکٹ فارمیٹ متعارف کرانے کی تجویز زیرِ غور ہے۔تفصیلات کے مطابق پی ایس ایل کے چیف ایگزیکٹو سلمان نصیر نے بتایا ہے کہ مجوزہ ایونٹ کو ’ایچ بی ایل پی ایس ایل سکسز‘ کا نام دیا جا سکتا ہے۔ یہ ٹورنامنٹ لیگ کے آف سیزن میں منعقد کرنے کی تجویز ہے، تاہم اس حوالے سے ابھی کوئی حتمی فیصلہ نہیں کیا گیا۔سلمان نصیر کے مطابق مختصر دورانیے کا یہ ایونٹ شائقین کے لیے دلچسپی اور تفریح کا باعث بننے کے ساتھ پی ایس ایل کو پاکستان کے ان چھوٹے شہروں تک پہنچانے میں بھی مدد دے سکتا ہے جہاں اب تک لیگ کے میچز منعقد نہیں ہوئے۔پاکستان کرکٹ بورڈ اس منصوبے کے ذریعے فرنچائزز اور میڈیا پارٹنرز کے لیے آمدنی کے نئے مواقع پیدا کرنے کا بھی خواہش مند ہے۔ اس اقدام سے لیگ کی سرگرمیوں کو بڑھانے اور کرکٹ کے مزید شائقین تک رسائی حاصل کرنے میں مدد ملنے کی توقع ہے۔تاہم مجوزہ ٹورنامنٹ کے انعقاد میں غیر ملکی کھلاڑیوں کی دستیابی اور مناسب شیڈول ترتیب دینا اہم چیلنجز ہوں گے۔واضح رہے کہ پی ایس ایل کے میچز اب تک کراچی، لاہور، ملتان اور راولپنڈی میں منعقد ہوتے رہے ہیں۔ بورڈ کی کوشش ہے کہ لیگ کو مزید وسعت دے کر ملک بھر کے شائقین تک پہنچایا جائے اور اس کی مقبولیت میں اضافہ کیا جائے۔
