نیویارک ( شوبز ڈیسک)ہالی ووڈ کی معروف اداکارہ اور سابق چائلڈ سٹار ڈیوگ چیس 35 برس کی عمر میں انتقال کر گئیں۔بین الاقوامی میڈیا رپورٹس کے مطابق اداکارہ کا انتقال منگل کے روز ہوا۔ ان کے قریبی ذرائع کے مطابق وہ کچھ عرصے سے شدید علالت کا شکار تھیں اور رواں ماہ کے آغاز میں انہیں لاس اینجلس کے ایک اسپتال میں داخل کیا گیا تھا۔ وہ گردن توڑ بخار اور خون میں انفیکشن کے باعث پیدا ہونے والی پیچیدگیوں سے لڑ رہی تھیں۔ڈیوگ چیس نے کم عمری میں ہی اپنی اداکاری اور آواز کی صلاحیتوں کے باعث شوبز انڈسٹری میں نمایاں مقام حاصل کیا۔ انہیں 2002 میں ریلیز ہونے والی معروف اینی میٹڈ فلم میں مرکزی کردار کے لیے آواز دینے پر عالمی شہرت ملی۔ بعد ازاں انہوں نے اسی کردار پر مبنی ٹیلی ویژن سیریز اور دیگر پروجیکٹس میں بھی اپنی آواز کا جادو جگایا۔ان کے انتقال کی خبر کے بعد مداحوں اور شوبز شخصیات نے سوشل میڈیا پر گہرے دکھ اور افسوس کا اظہار کیا ہے اور ان کی فنی خدمات کو خراجِ عقیدت پیش کیا جا رہا ہے۔ ہالی ووڈ انڈسٹری میں ان کے انتقال کو ایک بڑا نقصان قرار دیا جا رہا ہے۔
