لاہور( شو بز ڈیسک)پاکستان مسلم لیگ (ن) کی رہنما حنا پرویز بٹ نے ڈرامہ نگار خلیل الرحمٰن قمر کے تیزاب گردی سے متعلق بیان پر سخت ردِعمل دیتے ہوئے تنقید کی ہے۔حنا پرویز بٹ نے سوشل میڈیا پلیٹ فارم پر ایک ویڈیو شیئر کی جس میں وہ خواتین کے حقوق اور تیزاب گردی کے حالیہ واقعات پر گفتگو کرتی دکھائی دیتی ہیں۔ انہوں نے ڈاکٹر ماہ نور کے کیس سمیت دو حالیہ واقعات کا حوالہ دیتے ہوئے اس مسئلے کی سنگینی پر روشنی ڈالی۔اپنی پوسٹ کے کیپشن میں انہوں نے لکھا کہ وہ ایک نجی ٹی وی پروگرام میں خواتین کے حقوق پر بات کر رہی تھیں، تاہم تیزاب گردی کے موضوع پر گفتگو کے دوران خلیل الرحمٰن قمر کے بیان پر وہ حیران رہ گئیں۔ان کے مطابق خلیل الرحمٰن قمر نے کہا کہ بات اس انداز سے کی جا رہی ہے جیسے مرد حضرات جیبوں میں تیزاب کی بوتلیں لے کر باہر نکلتے ہیں، جس پر حنا پرویز بٹ نے اس رائے کو غیر مناسب قرار دیتے ہوئے شدید ردِعمل دیا۔
