کراچی( شوبز ڈیسک)پاکستانی ماڈل اور سوشل میڈیا انفلوئنسر ہما سلیم کا انسٹاگرام اکاؤنٹ ایک قومی کرکٹر پر ہراسانی، دھمکیوں اور ذہنی دباؤ ڈالنے کے الزامات سامنے آنے کے ایک روز بعد اچانک دستیاب نہیں رہا، جس کے بعد سوشل میڈیا پر مختلف قیاس آرائیاں شروع ہو گئی ہیں۔صارفین جب ہما سلیم کا انسٹاگرام پروفائل کھولنے کی کوشش کر رہے ہیں تو انہیں "معذرت، یہ صفحہ دستیاب نہیں ہے" کا پیغام نظر آ رہا ہے۔ تاہم اب تک یہ واضح نہیں ہو سکا کہ اکاؤنٹ انسٹاگرام انتظامیہ کی جانب سے معطل کیا گیا ہے یا اسے خود ہما سلیم نے حذف یا عارضی طور پر غیر فعال کیا ہے۔واضح رہے کہ ہما سلیم نے چند روز قبل اپنی انسٹاگرام اسٹوریز کے ذریعے ایک بیان جاری کیا تھا، جس میں انہوں نے ایک نامعلوم قومی کرکٹر پر ہراسانی، دھمکیوں اور ذہنی و جذباتی دباؤ ڈالنے کے الزامات عائد کیے تھے۔اگرچہ ماڈل نے کسی کھلاڑی کا نام ظاہر نہیں کیا، تاہم ان کا کہنا تھا کہ مذکورہ کرکٹر سے رابطہ ختم ہونے کے باوجود انہیں مبینہ طور پر مسلسل پریشان کیا جاتا رہا اور حالیہ دنوں میں دھمکیوں کا سلسلہ بھی شروع ہوا۔ہما سلیم نے اپنے بیان میں دعویٰ کیا تھا کہ وہ طویل عرصے تک ایک مشکل اور تکلیف دہ تعلق کا حصہ رہیں، لیکن خاموش رہنے کے باوجود حالات میں بہتری نہ آنے پر انہوں نے اپنا مؤقف عوام کے سامنے رکھنے کا فیصلہ کیا۔
