ممبئی( شو بز ڈیسک)بھارتی فلمی اداکارہ بھومی پڈنیکر نے انکشاف کیا ہے کہ وہ بچپن میں اداکار عمران خان کی بے حد مداح تھیں اور انہیں بہت پسند کرتی تھیں۔بھارتی فلمی صنعت میں رومانوی مزاحیہ فلموں کا ایک ایسا دور بھی گزرا ہے جب یہ طرزِ فلم شائقین کی اولین پسند سمجھا جاتا تھا۔ اسی دور میں عمران خان نے اپنی سادہ اور دلکش شخصیت کے باعث نوجوان ناظرین کے دلوں میں خاص جگہ بنائی۔کئی برس اداکاری سے دور رہنے کے بعد عمران خان اپنی نئی فلم ’’ادھورے ہم، ادھورے تم‘‘ کے ذریعے دوبارہ پردۂ سیمیں پر نظر آئیں گے۔ اس فلم میں ان کے ساتھ بھومی پڈنیکر مرکزی کردار ادا کر رہی ہیں۔ایک حالیہ گفتگو میں بھومی پڈنیکر نے بتایا کہ وہ بچپن سے عمران خان کی مداح رہی ہیں اور ان کے ساتھ کام کرنا ان کے لیے ایک یادگار تجربہ ہے۔ ان کا کہنا تھا کہ نوجوانی کے زمانے میں عمران خان انہیں بہت پسند تھے اور آج ان کے ساتھ فلم میں کام کرنا خوشی کا باعث ہے۔بھومی پڈنیکر نے اپنی نئی فلم کے بارے میں بات کرتے ہوئے کہا کہ آج کل معیاری رومانوی مزاحیہ فلمیں کم بنتی ہیں، تاہم اس فلم کی کہانی انہیں پہلی نظر میں پسند آ گئی۔ ان کے مطابق یہ ایک پختہ، دلکش اور جذبات سے بھرپور محبت کی داستان ہے۔اداکارہ نے مزید کہا کہ جن فنکاروں کو وہ ماضی میں پسند کرتی تھیں، ان کے ساتھ پردۂ سیمیں پر کام کرنا ان کے لیے ایک خوشگوار اور یادگار موقع ہے۔
