لاہور ( سپورٹس ڈیسک)ڈوپنگ معاملے میں قومی ریسلر انعام بٹ کو بڑا ریلیف ملنے کی توقع ہے۔ذرائع کے مطابق انٹرنیشنل ٹیسٹنگ ایجنسی نے انعام بٹ کا یہ مؤقف تسلیم کرلیا ہے کہ آنکھ کی تکلیف کے علاج کیلئے استعمال کی گئی ممنوعہ ادویات کا مقصد کارکردگی یا طاقت میں اضافہ کرنا نہیں تھا۔ذرائع کا کہنا ہے کہ ادویات صرف طبی ضرورت کے تحت استعمال کی گئیں، تاہم علاج کیلئے ان کے استعمال کی اجازت بروقت حاصل نہ کرنے پر انعام بٹ غفلت کے مرتکب ہوئے۔انعام بٹ کو کم از کم دو ماہ کی پابندی کا سامنا کرنا پڑسکتا ہے، جبکہ ایشین بیچ گیمز میں حاصل کیا گیا چاندی کا تمغہ بھی واپس لیے جانے کا امکان ہے۔ پابندی کا اطلاق اپریل سے ہوگا اور ممنوعہ ادویات کے آنکھوں کے علاج کیلئے استعمال کی تصدیق ہوگئی ہے۔انٹرنیشنل ٹیسٹنگ ایجنسی نے انعام بٹ کو مذکورہ دوا کے استعمال کی ایک سال کیلئے اجازت بھی دے رکھی ہے۔ذرائع کے مطابق انٹرنیشنل ٹیسٹنگ ایجنسی کا انعام بٹ کے معاملے پر باضابطہ فیصلہ جلد متوقع ہے، جس کے بعد وہ ایشین گیمز میں پاکستان کی نمائندگی کرسکیں گے اور بطور کوچ قومی ٹیم کے ہمراہ جاپان بھی جاسکیں گے۔فیصلے کے بعد انعام بٹ سیکریٹری فیڈریشن اور ایتھلیٹس کمیشن کے چیئرمین کی ذمہ داریاں بھی سنبھال سکیں گے۔ڈوپنگ معاملے کے بعد انعام بٹ نے کھیل کے مفاد اور غیر جانب داری کو مدنظر رکھتے ہوئے رضاکارانہ طور پر اپنے عہدوں سے علیحدگی اختیار کرلی تھی۔
