اسلام آباد(پاکستان خبر) وزیراعظم شہباز شریف نے گلگت بلتستان میں 100 میگاواٹ شمسی توانائی کے منصوبے پر کام کی رفتار تیز کرنے اور اسے جلد از جلد مکمل کرنے کی ہدایت جاری کر دی ہے۔وزیراعظم کی زیر صدارت منصوبے سے متعلق جائزہ اجلاس ہوا جس میں متعلقہ حکام نے گلگت بلتستان میں وفاقی حکومت کے سولر منصوبے پر تفصیلی بریفنگ دی۔اس موقع پر وزیراعظم نے کہا کہ وفاقی حکومت گلگت بلتستان کے عوام کے لیے 100 میگاواٹ شمسی بجلی کی فراہمی کے منصوبے کے تمام اخراجات برداشت کرے گی۔انہوں نے منصوبے میں شفافیت یقینی بنانے کے لیے غیر جانبدار تھرڈ پارٹی ویلیڈیشن کی بھی ہدایت کی۔بریفنگ میں بتایا گیا کہ گلگت بلتستان کی سرکاری عمارتوں کے لیے 18 میگاواٹ شمسی توانائی کا منصوبہ جاری ہے، جس کے تحت مختلف ڈویژنز میں سولرائزیشن کے منصوبے 2026 کے دوران مکمل کیے جائیں گے۔مزید بتایا گیا کہ گلگت، سکردو، چلاس اور خپلو میں گھریلو صارفین کے لیے 82 میگاواٹ کے شمسی توانائی منصوبے پر بھی کام جاری ہے۔اجلاس میں وفاقی وزراء اور اعلیٰ حکام نے شرکت کی۔
