لاہور( سپورٹس ڈیسک)سابق بھارتی کرکٹر عرفان پٹھان کو دبئی میں افغان اسٹار کرکٹر راشد خان کے گھر کھانے کی دعوت کی ویڈیو سوشل میڈیا پر شیئر کرنے کے بعد انتہا پسند بھارتی صارفین کی تنقید کا سامنا کرنا پڑ رہا ہے۔راشد خان نے اپنی رہائش گاہ پر عرفان پٹھان اور ان کے بھائی یوسف پٹھان کی میزبانی کی، جہاں مہمانوں کی تواضع روایتی افغان کھانوں سے کی گئی۔عرفان پٹھان نے دعوت کی ویڈیو سوشل میڈیا پر شیئر کرتے ہوئے راشد خان اور ان کی اہلیہ لیلوما کی مہمان نوازی اور کھانوں کی تعریف کی۔انہوں نے اپنے پیغام میں لکھا کہ یہ ایک ناقابلِ یقین افغان دعوت تھی، جہاں ہر کھانے کا ذائقہ منفرد تھا۔ ان کے مطابق اس محفل کو خاص بنانے والی چیز کھانوں کے ساتھ میزبانوں کی محبت اور گرمجوشی بھی تھی۔سابق بھارتی کرکٹر نے راشد خان کو مخاطب کرتے ہوئے مزید لکھا کہ وہ اب تک اس لذیذ کھانے کے بارے میں سوچ رہے ہیں۔ویڈیو سوشل میڈیا پر تیزی سے وائرل ہوگئی، تاہم اس کے بعد انتہا پسند بھارتی صارفین نے عرفان پٹھان کو گائے کا گوشت کھانے کے معاملے پر شدید تنقید کا نشانہ بنایا۔
