اسرائیل کا ٹرمپ پر مبینہ ایرانی حملے سے متعلق خفیہ معلومات دینے کا دعویٰ

واشنگٹن( مانیٹرنگ ڈیسک) امریکی ذرائع ابلاغ نے دعویٰ کیا ہے کہ اسرائیل نے حالیہ دنوں امریکا کو ایسی خفیہ معلومات فراہم کی ہیں جن میں امریکی صدر ڈونلڈ ٹرمپ کو نشانہ بنانے کے ایک مبینہ مخصوص ایرانی منصوبے کا ذکر کیا گیا ہے۔امریکی نشریاتی ادارے سی این این نے باخبر ذرائع کے حوالے سے بتایا کہ امریکی حکام کو طویل عرصے سے صدر ٹرمپ کے خلاف ممکنہ حملوں سے متعلق مختلف اطلاعات موصول ہوتی رہی ہیں، تاہم اسرائیل کی جانب سے دی گئی حالیہ معلومات ایک نئے اور مخصوص منصوبے سے متعلق ہیں۔اسی حوالے سے وال اسٹریٹ جرنل نے بھی نام ظاہر نہ کرنے والے ذرائع کے حوالے سے دعویٰ کیا ہے کہ اسرائیلی خفیہ اداروں نے امریکا کو صدر ٹرمپ کے خلاف ایک مبینہ منصوبے سے آگاہ کیا ہے۔یہ رپورٹس ایسے وقت میں سامنے آئی ہیں جب ایران اور امریکا کے درمیان ایک بار پھر فوجی کشیدگی میں اضافہ دیکھنے میں آ رہا ہے، جس کے باعث خطے میں بڑے تصادم کے خدشات بھی بڑھ گئے ہیں۔دوسری جانب نیٹو سربراہی اجلاس کے بعد صدر ٹرمپ کے ترکیہ سے روانگی کیلئے ایک مختلف طیارہ استعمال کرنے کے معاملے پر بھی مختلف قیاس آرائیاں کی جا رہی ہیں۔ایرانی حکومت کی جانب سے تاحال ان میڈیا رپورٹس پر کوئی باضابطہ ردعمل سامنے نہیں آیا۔