لاہور( شوبز ڈیسک) پاکستانی اداکارہ فائزہ حسن کا کہنا ہے کہ والدین کو چاہیے کہ وہ اپنے بچوں کو بے وفائی اور ازدواجی زندگی میں دھوکہ دہی جیسے رویوں کے بارے میں مناسب انداز میں آگاہ کریں۔فائزہ حسن ایک باصلاحیت اور ہمہ جہت اداکارہ ہیں جنہوں نے برنز روڈ کی نیلوفر، آپا شمیم اور تم لڑکے بھی نا جیسے ڈراموں میں اپنی عمدہ اداکاری سے ناظرین کو متاثر کیا۔اداکارہ دو بچوں کی ماں ہیں جن میں سترہ سالہ بیٹی اور چودہ سالہ بیٹا شامل ہیں۔فائزہ حسن حال ہی میں ایک پروگرام میں بطور مہمان شریک ہوئیں جہاں انہوں نے نئی نسل کی پرورش اور نوجوانوں کے زیادہ باخبر اور سمجھدار ہونے کے موضوع پر گفتگو کی۔گفتگو کے دوران ان سے سوال کیا گیا کہ کیا بچوں کو شادی کے بعد تعلقات میں بے وفائی اور دھوکہ دہی جیسے معاملات کے بارے میں آگاہ کیا جانا چاہیے اور انہیں بتایا جانا چاہیے کہ یہ عمل کتنا غلط ہے۔اس سوال کے جواب میں فائزہ حسن نے کہا کہ بچوں کو نرم اور بالواسطہ انداز میں یہ بات سمجھائی جا سکتی ہے کہ دھوکہ دینا اور بے وفائی کرنا درست عمل نہیں ہے۔ان کا کہنا تھا کہ جب کسی خبر یا ڈرامے میں ایسا موضوع سامنے آئے تو والدین کو چاہیے کہ وہ اس عمل کی حوصلہ شکنی کریں تاکہ بچوں کو صحیح اور غلط کا فرق سمجھایا جا سکے۔انہوں نے مزید کہا کہ بچوں کو براہ راست لیکچر دینا زیادہ مؤثر طریقہ نہیں ہوتا بلکہ عملی مثالوں اور گفتگو کے ذریعے بہتر انداز میں رہنمائی کی جا سکتی ہے۔فائزہ حسن نے کم عمری میں شادی کرنے والے نوجوانوں کو مشورہ دیتے ہوئے کہا کہ اگرچہ کم عمر میں شادی کرنا بری بات نہیں، تاہم زندگی کے اہم فیصلے سے پہلے اپنی فلاح و بہبود اور مستقبل کے بارے میں سنجیدگی سے سوچنا ضروری ہے۔
