لاہور( ویب ڈیسک) امریکی خلائی ادارے کی جیمز ویب اسپیس ٹیلی اسکوپ نے ایک نئی اور دلکش کہکشاں کی تصویر جاری کی ہے جو زمین سے کروڑوں نوری سال کے فاصلے پر موجود ہے۔ماہرین کے مطابق یہ کہکشاں میسیئر 77 کے نام سے جانی جاتی ہے، جسے سکوئیڈ گلیکسی بھی کہا جاتا ہے۔ یہ زمین سے تقریباً 4 کروڑ 50 لاکھ نوری سال دور سیٹس نامی کہکشاں کے جھرمٹ میں واقع ہے۔یہ کہکشاں ساخت کے اعتبار سے ہماری ملکی وے کی طرح ایک بار نما سرپل کہکشاں ہے، تاہم اس کا مرکز غیر معمولی طور پر زیادہ روشن ہے۔اس غیر معمولی چمک کی وجہ اس کے مرکز میں موجود ایک بہت بڑا بلیک ہول ہے جو مسلسل قریبی مادہ اپنی طرف کھینچ رہا ہے۔ ماہرین کے مطابق یہ بلیک ہول سورج سے لاکھوں گنا زیادہ کمیت رکھتا ہے اور اس کی کشش کی وجہ سے گرد و نواح میں مادہ تیزی سے گھوم کر شدید حد تک گرم ہو جاتا ہے۔اس عمل کے نتیجے میں پیدا ہونے والی توانائی اور روشنی اتنی زیادہ ہے کہ بعض اوقات یہ پوری کہکشاں کی مجموعی روشنی پر بھی غالب آ جاتی ہے۔
