کراچی( شوبز ڈیسک)پاکستانی سپر ماڈل و اداکارہ جیا علی نے اپنے شوہر عمران کی پہلی شادی، سابق اہلیہ اور بیٹیوں سے تعلقات کے بارے میں تفصیلات بیان کردیں۔ایک پوڈکاسٹ میں گفتگو کرتے ہوئے جیا علی نے بتایا کہ عمران نے 22 برس کی عمر میں ہانگ کانگ کی ایک چینی خاتون سے شادی کی تھی، جس سے ان کی دو بیٹیاں ہیں۔ دونوں بیٹیوں کی عمریں 18 اور 20 سال ہیں اور والدین نے مل کر ان کی پرورش کی۔جیا علی کے مطابق وہ شادی سے پہلے ہی شوہر کے ماضی سے آگاہ تھیں۔ ان کی شادی کے وقت عمران کو طلاق ہوئے تقریباً 10 برس گزر چکے تھے۔اداکارہ نے کہا کہ عمران اور سابق اہلیہ کے درمیان آج بھی باہمی احترام موجود ہے۔ انہوں نے شوہر کو بیٹیوں کے ساتھ ذمہ دار والد کے طور پر دیکھا، جس سے انہیں یقین ہوا کہ وہ اچھے شوہر بھی ثابت ہوں گے۔جیا علی کا کہنا تھا کہ شوہر کا سابق اہلیہ سے کوئی ذاتی تعلق نہیں، تاہم وہ اپنی سوتیلی بیٹیوں کے ساتھ گہری وابستگی رکھتی ہیں۔
