کراچی( شوبز ڈیسک)کراچی میں معروف اداکارہ ثانیہ سعید نے کہا ہے کہ صرف ٹرانسپورٹ منصوبے شہر کے مسائل حل نہیں کر سکتے، اصل ضرورت شہریوں کے لیے روزگار کے مواقع پیدا کرنا ہے۔کراچی میں ایک پریس گفتگو کے دوران انہوں نے کہا کہ اگر شہریوں کے پاس روزگار ہی نہیں ہوگا تو وہ جدید ٹرانسپورٹ سہولیات سے کیسے فائدہ اٹھا سکیں گے۔ ان کے مطابق شہر کی بڑی آبادی کے مسائل کو صرف بس سروسز کے ذریعے حل نہیں کیا جا سکتا۔اداکارہ نے سوال اٹھایا کہ اتنی بڑی آبادی والے شہر میں لوگوں کی بنیادی ضروریات اور روزگار کے بارے میں مؤثر منصوبہ بندی کیوں نہیں کی جاتی۔ان کا کہنا تھا کہ اصل ترقی اس وقت ممکن ہے جب شہری معیشت کا حصہ بنیں اور باعزت روزگار حاصل کریں، نہ کہ صرف ٹرانسپورٹ منصوبوں کو ترقی کا پیمانہ سمجھا جائے۔ثانیہ سعید نے مزید کہا کہ کراچی جیسے بڑے شہر کے لیے جامع حکمتِ عملی کی ضرورت ہے جس میں روزگار، معیشت اور شہری منصوبہ بندی کو ترجیح دی جائے تاکہ نوجوانوں کو بہتر مستقبل فراہم کیا جا سکے۔
