ممبئی( شو بز ڈیسک)بالی ووڈ اداکار گووندا اور ان کی اہلیہ سنیتا آہوجا کے درمیان جاری اختلافات کے دوران اداکارہ کشمیرا شاہ نے محبت، شادی اور بے وفائی سے متعلق ایک معنی خیز پوسٹ شیئر کردی۔گووندا کے بھانجے کرشنا ابھیشیک کی اہلیہ کشمیرا شاہ نے آسمان پر دل کی شکل میں بننے والے بادلوں کی تصویر شیئر کرتے ہوئے سوال کیا کہ کیا آج بھی سچی محبت کا وجود باقی ہے؟اپنی انسٹاگرام پوسٹ میں انہوں نے پوچھا کہ کیا کوئی شخص کسی سے اتنی محبت کرسکتا ہے کہ اس کے لیے بہت کچھ خرچ کرے اور اسے خاص محسوس کروائے، اور اگر ایسی محبت حقیقت ہے تو وہ کہاں مل سکتی ہے؟کشمیرا نے مزید کہا کہ وہ مسلسل شادیوں کے ٹوٹنے اور لوگوں کی جانب سے ایک دوسرے کو دھوکا دینے کے واقعات دیکھ کر دل برداشتہ ہیں، جس کے باعث انہیں ان معاملات پر دوبارہ غور کرنے کی ضرورت محسوس ہوئی۔ان کے یہ تبصرے ایسے وقت سامنے آئے ہیں جب گووندا اور سنیتا آہوجا کی ازدواجی زندگی سے متعلق معاملات میڈیا اور سوشل میڈیا پر زیر بحث ہیں اور دونوں حالیہ عرصے میں اپنی شادی کے حوالے سے عوامی سطح پر مختلف بیانات دے چکے ہیں۔
