پشاور (پاکستان خبر) وزیراعلیٰ خیبر پختونخوا کی زیر صدارت پارلیمانی پارٹی کا اجلاس منعقد ہوا جس میں سیاسی اور انتظامی امور پر غور کیا گیا۔ اجلاس میں حکمران جماعت کے متعدد ارکان کی عدم شرکت بھی سامنے آئی۔رپورٹ کے مطابق پی ٹی آئی کے 30 سے 35 ارکان اسمبلی اجلاس میں شریک نہیں ہوئے جبکہ سابق وزیراعلیٰ علی امین گنڈا پور بھی اجلاس میں موجود نہیں تھے۔وزیراعلیٰ سہیل آفریدی نے اجلاس سے خطاب کرتے ہوئے کہا کہ بانی پی ٹی آئی سے ملاقات کی اجازت نہیں دی جا رہی، اور ان کی صحت کے حوالے سے پارٹی سمیت پوری قوم میں تشویش پائی جاتی ہے۔ انہوں نے مطالبہ کیا کہ بانی پی ٹی آئی کا علاج ان کے اہل خانہ کی موجودگی میں کیا جائے۔انہوں نے مزید کہا کہ آئندہ سال کا بجٹ عوامی مفاد کے مطابق تیار کیا جائے گا اور ترقیاتی منصوبوں میں بانی پی ٹی آئی کے وژن کی جھلک نظر آئے گی۔ذرائع کے مطابق اجلاس میں 92 میں سے 52 ارکان نے شرکت کی جبکہ حکومتی ذرائع نے دعویٰ کیا کہ تقریباً 72 ارکان اجلاس میں موجود تھے۔مزید بتایا گیا ہے کہ بعض ارکان بیرون ملک ہونے یا ذاتی مصروفیات کے باعث اجلاس میں شریک نہ ہو سکے جبکہ چند ناراض ارکان نے بھی اجلاس میں شرکت کی۔
