گھر سے الگ رہنے کا مطلب یہ نہیں کہ کسی نے اپنے خاندان کو چھوڑ دیا:کومل عزیز

کراچی( شوبز ڈیسک)کومل عزیز خان نے کہا ہے کہ لڑکیوں کو اپنی تعلیم، خودمختاری اور بنیادی حقوق کے حصول کے لیے مضبوط اور ثابت قدم ہونا چاہیے اور معاشرتی دباؤ کے آگے نہیں جھکنا چاہیے۔کراچی سے تعلق رکھنے والی اداکارہ نے اپنے انسٹاگرام اکاؤنٹ پر سوال و جواب کے سیشن کے دوران مداحوں کے مختلف سوالات کے جواب دیے۔کومل عزیز خان نے انکشاف کیا کہ وہ ڈیڑھ سال قبل اپنے خاندانی گھر سے الگ ہو کر آزادانہ زندگی گزار رہی ہیں۔ ان کے مطابق وہ اب اپنی بہترین دوست اور اپنی پالتو بلی کے ساتھ رہتی ہیں، جبکہ ان کا خاندان قریب ہی رہتا ہے اور اکثر ان کے لیے گھر کا کھانا بھیجتا ہے، جسے وہ اپنی زندگی کا بہترین دور قرار دیتی ہیں۔اداکارہ نے واضح کیا کہ خاندانی گھر سے الگ رہنے کا مطلب یہ نہیں کہ کسی نے اپنے خاندان کو چھوڑ دیا ہے، بلکہ یہ ذاتی آزادی اور طرزِ زندگی کا انتخاب ہو سکتا ہے۔شادی کے حوالے سے بات کرتے ہوئے انہوں نے کہا کہ وہ معاشرتی دباؤ کو اہمیت نہیں دیتیں اور اپنی زندگی کے فیصلے خود کرنے پر یقین رکھتی ہیں۔