کومل عزیز کا شادی سے متعلق بیان، خواتین کو اپنی صحت کا خیال رکھنے کا مشورہ

کراچی ( شو بز ڈیسک) پاکستانی سابق اداکارہ اور ماڈل کومل عزیز خان نے شادی سے متعلق اپنے بیان میں کہا ہے کہ شاید ان کی شادی کی عمر گزر چکی ہے اور اب وہ خود کو شادی کے قابل نہیں سمجھتیں۔ ان کا کہنا ہے کہ ان کی زندگی دوسری خواتین کے لیے سبق بن سکتی ہے، جنہیں اپنی صحت اور ذات کا خیال رکھنا چاہیے۔کومل عزیز خان شوبز انڈسٹری کو خیرباد کہنے کے بعد کاروباری دنیا میں کامیابی حاصل کر چکی ہیں۔ حال ہی میں وہ اپنے وزن میں نمایاں اضافے کے باعث خبروں کی زینت بنیں، جس کے بعد سوشل میڈیا پر ان کے حوالے سے مختلف قیاس آرائیاں کی جانے لگیں۔جسمانی خدوخال میں تبدیلی کے بعد سابق اداکارہ کو سوشل میڈیا صارفین کی جانب سے تنقید اور طنز کا سامنا بھی کرنا پڑ رہا ہے۔کومل عزیز نے اپنے انسٹاگرام اکاؤنٹ پر سوال و جواب کا ایک سیشن منعقد کیا، جس میں مداحوں نے ان سے مختلف سوالات کیے اور زیرِ گردش افواہوں کے بارے میں بھی دریافت کیا۔ایک مداح نے ان سے سوال کیا کہ وہ شادی کیوں نہیں کر رہیں اور ان کی عمر زیادہ کیوں دکھائی دینے لگی ہے؟اس سوال کے جواب میں کومل عزیز نے کہا کہ شاید ان کی شادی کی عمر گزر گئی ہے اور اب وہ شادی کے قابل نہیں رہیں۔ تاہم، انہوں نے اس صورتِ حال کو دوسری خواتین کے لیے ایک سبق قرار دیتے ہوئے کہا کہ خواتین کو اپنی ذات اور صحت کا خیال رکھنا چاہیے۔سوال و جواب کے اسی سلسلے میں ایک مداح نے انہیں اداکار عدیل چوہدری سے شادی کرنے کا مشورہ بھی دیا۔اس تجویز پر کومل عزیز نے کہا کہ عدیل چوہدری ایک بہترین اداکار اور اچھے انسان ہیں، تاہم وہ کسی اداکار سے شادی نہیں کرنا چاہتیں۔ان کا کہنا تھا کہ وہ نہیں چاہتیں کہ ان کے شوہر کے دوسری خواتین کے ساتھ قریبی تعلقات ہوں، کیونکہ ان کے خیال میں خواتین کے ساتھ قربت اداکاروں کے پیشے کا ایک حصہ ہے۔