ممبئی( شوبز ڈیسک)بھارتی اداکار جیکی شروف کی صاحبزادی کرشنا شروف نے اپنی ذاتی زندگی کے حوالے سے اہم انکشاف کرتے ہوئے بتایا ہے کہ وہ ایک افغان مکسڈ مارشل آرٹس (ایم ایم اے) فائٹر کے ساتھ ’’لیو اِن ریلیشن شپ‘‘ میں ہیں۔33 سالہ کرشنا اس وقت ریئلٹی شو ’دی 50‘ میں شریک ہیں، جہاں ایک حالیہ قسط کے دوران انہوں نے اپنی نجی زندگی کے بارے میں کھل کر بات کی۔ کرشنا نے بتایا کہ وہ فٹنس کے شعبے میں دلچسپی رکھتی ہیں اور اسی شعبے سے منسلک ایک ایم ایم اے فائٹر کے ساتھ ان کا رشتہ قائم ہوا۔بھارتی میڈیا رپورٹس کے مطابق کرشنا نے فائٹر کا نام نہیں لیا، تاہم ذرائع کے مطابق وہ افغان فائٹر عبدالعظیم بداخشی ہیں۔ کرشنا کے مطابق دونوں کی پہلی ملاقات ممبئی میں ایک ایونٹ کے دوران ہوئی، جس کے بعد انسٹاگرام پر رابطہ قائم ہوا اور آٹھ ماہ تک ویڈیو کالز کے ذریعے گفتگو جاری رہی۔بعد ازاں دونوں گوا میں ملے، جہاں دو ہفتے ایک ساتھ گزارنے کے بعد رشتہ مزید مضبوط ہوا۔ اس کے بعد دہلی میں کچھ وقت گزارا اور پھر ممبئی میں ایک ساتھ رہنے کا فیصلہ کیا گیا۔کرشنا شروف نے بتایا کہ محبت کا اصل مطلب ایک دوسرے کی خوشی اور سکون کا خیال رکھنا ہے۔ انہوں نے یہ بھی بتایا کہ تعلق کے آغاز میں زبان ایک چیلنج تھی کیونکہ ان کے ساتھی فارسی بولتے تھے جبکہ وہ انگریزی میں بات کرتی تھیں، اور دونوں کی ہندی بھی زیادہ مضبوط نہیں تھی، لیکن باہمی سمجھ اور رابطے نے فاصلے کم کر دیے۔
