لاہور ( سپورٹس ڈیسک)لاہور قلندرز کی جانب سے زمبابوے کے کرکٹرز کے اعزاز میں الوداعی عشائیے کا اہتمام کیا گیا۔ زمبابوے کے کھلاڑی اسلام آباد میں واقع لاہور قلندرز کے ہائی پرفارمنس سینٹر میں پانچ ہفتوں کے تربیتی پروگرام میں شریک تھے۔یہ تربیتی پروگرام زمبابوے کرکٹ اور لاہور قلندرز کے درمیان طے پانے والے تبادلہ پروگرام کا حصہ تھا، جس کا مقصد زمبابوے کے کھلاڑیوں کو اپنی صلاحیتیں بہتر بنانے اور کرکٹ کی نئی مہارتیں سیکھنے کے مواقع فراہم کرنا تھا۔پانچ ہفتوں پر مشتمل تربیتی سیشن کے دوران کھلاڑیوں نے کرکٹ کی باریکیوں سے آگاہی حاصل کرنے کے ساتھ ایک دوسرے کے ساتھ وقت گزارا اور دوستانہ تعلقات بھی استوار کیے۔پروگرام کے اختتام پر لاہور قلندرز نے زمبابوے کے کھلاڑیوں کے لیے خصوصی عشائیے کا اہتمام کیا اور ان کے مستقبل کے لیے نیک تمناؤں کا اظہار کیا۔لاہور قلندرز کی انتظامیہ کے مطابق یہ پروگرام محض کرکٹ کی تربیت تک محدود نہیں تھا بلکہ اس کے ذریعے دونوں ملکوں کے کھلاڑیوں کے درمیان دوستی اور باہمی روابط کو بھی فروغ ملا۔انتظامیہ کا کہنا ہے کہ لاہور قلندرز اور زمبابوے کرکٹ کے درمیان یہ تعاون دونوں ملکوں کے کرکٹرز کو ایک دوسرے کے تجربات سے فائدہ اٹھانے اور کھیل کی ترقی میں کردار ادا کرنے کا موقع فراہم کرتا ہے۔ پروگرام کے اگلے مرحلے میں پاکستانی کھلاڑی زمبابوے کا دورہ کریں گے۔
