لیڈز( سپورٹس ڈیسک) پاکستان کے خلاف لیڈز ٹیسٹ کی پہلی اننگز میں شاندار بولنگ کرنے والے انگلینڈ کے اولی رابنسن اور جوش ٹنگ نے میچ کی گیند کو منفرد انداز میں آپس میں تقسیم کرکے نئی مثال قائم کردی۔پاکستان کو پہلی اننگز میں 171 رنز پر آؤٹ کرنے کے دوران دونوں انگلش بولرز نے پانچ، پانچ وکٹیں حاصل کیں۔ چونکہ ایک ہی اننگز میں دو بولرز کا پانچ، پانچ وکٹیں لینا کم ہی دیکھنے میں آتا ہے، اس لیے دونوں نے گیند کو یادگار کے طور پر رکھنے کا فیصلہ کیا۔جوش ٹنگ نے گراؤنڈ سے واپس جاتے ہوئے اولی رابنسن کو تجویز دی کہ گیند کو درمیان سے کاٹ کر دونوں آدھا آدھا رکھ لیتے ہیں۔ رابنسن نے بھی اس خیال سے اتفاق کیا۔بعد ازاں ڈریسنگ روم پہنچ کر جوش ٹنگ نے گراؤنڈ اسٹاف سے گیند کو دو حصوں میں کاٹنے کی درخواست کی، جس پر عمل کرتے ہوئے اسٹاف نے کچھ دیر بعد گیند کے دو ٹکڑے کرکے دونوں بولرز کے حوالے کردیئے۔اولی رابنسن کا کہنا تھا کہ کرکٹ کی آدھی گیند بطور یادگار ملنا روز روز کا معاملہ نہیں، اس لیے یہ ایسا واقعہ ہے جسے وہ اور جوش ٹنگ ہمیشہ یاد رکھیں گے۔
