لاہور( سپورٹس ڈیسک)ارجنٹینا کے عالمی شہرت یافتہ فٹبالر لیونل میسی نے اعتراف کیا ہے کہ بچپن میں اسکول کے زمانے میں انگریزی زبان نہ سیکھنا ان کے لیے آج بھی پچھتاوے کا باعث ہے۔فٹبال کی دنیا میں تقریباً ہر بڑا اعزاز اپنے نام کرنے والے میسی نے انفرادی سطح پر بیلن ڈی اور، کلب کی جانب سے چیمپئنز لیگ اور ارجنٹینا کے ساتھ فیفا ورلڈ کپ جیتنے سمیت بے شمار کامیابیاں حاصل کیں، تاہم ان کا کہنا ہے کہ زندگی میں بعض مواقع سے فائدہ نہ اٹھانے کا افسوس اب بھی موجود ہے۔ایک میکسیکن پوڈکاسٹ کو انٹرویو دیتے ہوئے میسی نے بتایا کہ اگر وہ کوئی دوسری زبان جانتے ہوتے تو زندگی میں ملنے والی کئی غیر معمولی شخصیات سے براہِ راست بات چیت کرسکتے تھے، لیکن زبان کی رکاوٹ کے باعث ایسا ممکن نہیں ہوسکا۔انہوں نے کہا کہ بچپن میں انگریزی سیکھنے کا موقع موجود تھا اور کم از کم اس زبان کو پڑھنے کے لیے وقت بھی نکالا جاسکتا تھا، مگر انہوں نے ایسا نہیں کیا۔ میسی کے مطابق یہ ان کی ایسی غلطیوں میں سے ایک ہے جس کا انہیں گہرا افسوس ہے۔عالمی شہرت حاصل کرنے کے باوجود میسی بنیادی طور پر ہسپانوی زبان میں گفتگو کرتے رہے ہیں اور دوسری زبان میں بات چیت کی ضرورت پڑنے پر اکثر مترجم کی مدد لیتے ہیں۔میسی اب اپنے بچوں کو اس تجربے سے سبق سیکھنے کی تلقین کرتے ہیں۔ ان کا کہنا ہے کہ وہ بچوں کو انگریزی سیکھنے اور دستیاب مواقع سے بھرپور فائدہ اٹھانے کی ترغیب دیتے ہیں، کیونکہ ان کے بچوں کے حالات ان کے اپنے بچپن سے مختلف ہیں۔فٹبال اسٹار نے ارجنٹینا میں اپنی اسکول کی تعلیم کے آخری سال کو بھی مایوس کن قرار دیا۔
