لاہور ( سپورٹس ڈیسک)لارڈز ٹیسٹ میں پاکستان ٹیم کی شکست کے بعد چیئرمین پی سی بی محسن نقوی آئندہ چند روز میں مزید سخت فیصلے کرنے کے حوالے سے مشاورت کررہے ہیں۔ذرائع کے مطابق چیئرمین پی سی بی قومی کرکٹ ٹیم کے سینئر اور تجربہ کار کھلاڑیوں کی کارکردگی سے انتہائی مایوس ہیں۔ انہوں نے ناکامی کے بعد تجربہ کار کرکٹرز کو دوبارہ موقع نہ دینے کے حوالے سے سلیکشن کمیٹی کو واضح ہدایات جاری کردی ہیں۔محسن نقوی نوجوان اور جونیئر کھلاڑیوں کو آگے لانے کے خواہش مند ہیں، جو مستقبل میں قومی ٹیم کی باگ ڈور سنبھال سکیں۔ اس سلسلے میں چیئرمین نے مستقبل میں انڈر 19 اور جونیئر کرکٹرز کو زیادہ سے زیادہ مواقع دینے اور انہیں مکمل اعتماد فراہم کرنے کی پالیسی اپنانے کی ہدایت کی ہے۔واضح رہے کہ دورہ انگلینڈ میں پاکستان ٹیسٹ ٹیم کو مسلسل 2 ٹیسٹ میچوں میں شکست کے بعد صورتحال میں بھونچال آگیا ہے۔ قومی ٹیم اور مینجمنٹ میں اکھاڑ پچھاڑ کا سلسلہ جاری ہے، جس کے باعث کھلاڑیوں میں شدید بے چینی پائی جارہی ہے۔
