کراچی( شوبز ڈیسک)پاکستان کی نامور اداکارہ ماہرہ خان نے کہا ہے کہ وہ اپنی زندگی کے موجودہ مرحلے سے بھرپور لطف اندوز ہو رہی ہیں اور انہیں اس بات کی کوئی فکر نہیں کہ ایک وقت ایسا بھی آئے گا جب انہیں روایتی ہیروئن کے کردار کم ملیں گے۔دبئی میں منعقدہ ایک ادبی و ثقافتی تقریب کے دوران گفتگو کرتے ہوئے انہوں نے کہا کہ کامیابی اور مداحوں کی محبت ان کے لیے بہت اہم ہے اور وہ اپنے ناظرین کے ساتھ تعلق کو ہمیشہ قدر کی نگاہ سے دیکھتی ہیں۔ماہرہ خان کے مطابق شہرت اور مقبولیت مستقل نہیں ہوتیں، اسی لیے وہ اپنی توجہ ہمیشہ اپنے کام اور فن پر مرکوز رکھتی ہیں۔ ان کا کہنا تھا کہ وہ اپنی موجودہ عمر اور زندگی کے اس مرحلے سے مکمل طور پر مطمئن ہیں اور اسے بھرپور انداز میں انجوائے کر رہی ہیں۔اداکارہ نے مزید کہا کہ انہیں اس حقیقت کا احساس ہے کہ وقت کے ساتھ کرداروں کی نوعیت بدلتی رہتی ہے، لیکن وہ اس تبدیلی کو مثبت انداز میں قبول کرتی ہیں۔ انہوں نے ہدایت کاروں اور پروڈیوسرز سے اپیل کی کہ انہیں صرف روایتی ہیروئن کے کرداروں تک محدود نہ رکھا جائے بلکہ مختلف اور منفرد کرداروں میں بھی موقع دیا جائے تاکہ وہ اپنی اداکاری کے نئے پہلو ناظرین کے سامنے لا سکیں۔
