اسلام آباد( کامرس ڈیسک) پاکستان میں 3.5 ارب ڈالر کی لاگت سے مجوزہ فالکن آئلز ریفائنری اور ذخیرہ گاہ منصوبے نے اہم ادارہ جاتی مرحلہ طے کرلیا ہے۔ضلع ٹھٹھہ کے علاقے دھابیجی میں قائم کیے جانے والے اس منصوبے کی چین پاکستان اقتصادی راہداری سیکریٹریٹ نے منظوری دے دی ہے اور سرمایہ کاری بورڈ سے سفارش کی ہے کہ اسے صنعتی تعاون سے متعلق مشترکہ ورکنگ گروپ کے اجلاس میں پیش کیا جائے۔یہ منصوبہ حالیہ برسوں میں نجی شعبے کی جانب سے پاکستان میں کی جانے والی بڑی صنعتی سرمایہ کاری میں شامل ہوسکتا ہے۔ اس پیش رفت کو ملک کے پٹرولیم اور توانائی کے بنیادی ڈھانچے میں نجی سرمایہ کاری بڑھانے کی حکومتی کوششوں کے حوالے سے بھی اہم قرار دیا جارہا ہے۔
