ممبئی( شو بز ڈیسک)بالی ووڈ کی مشہور ہارر فلم ’راز‘ میں بھوت کا کردار ادا کرکے شہرت حاصل کرنے والی سابق اداکارہ اور ماڈل مالینی شرما نے شوبز سے دور اپنی نئی زندگی سے مداحوں کو حیران کردیا۔مالینی شرما اس وقت اداکاری سے دور ’دی سلو لوکل‘ نامی فارم اسٹے چلا رہی ہیں، جو بھارتی شہر پونے کے قریب سہیادری پہاڑیوں میں واقع ہے۔حال ہی میں ان کی موجودہ زندگی کی تصاویر اور ویڈیوز سوشل میڈیا پر وائرل ہوئیں تو بڑی تعداد میں مداحوں نے فارم اسٹے سے رابطے شروع کردیے۔صورتحال یہاں تک پہنچ گئی کہ فارم اسٹے کی انتظامیہ کے لیے مسلسل آنے والی فون کالز کو سنبھالنا مشکل ہوگیا، جس پر مالینی شرما نے خود ویڈیو پیغام جاری کرکے مداحوں سے خصوصی درخواست کردی۔مالینی شرما نے سوشل میڈیا پر جاری ویڈیو میں مداحوں کی محبت اور غیر معمولی ردعمل پر شکریہ ادا کرتے ہوئے کہا کہ انہیں لوگوں کی اتنی توجہ اور بڑے پیمانے پر ردعمل کی بالکل توقع نہیں تھی۔انہوں نے کہا کہ وہ مداحوں کے پیغامات سے بہت متاثر اور خوش ہیں، تاہم فارم اسٹے ایک چھوٹی سی پراپرٹی ہے اور اچانک آنے والی بے شمار فون کالز کو سنبھالنا انتظامیہ کے لیے مشکل ہوگیا ہے۔اداکارہ نے مداحوں سے درخواست کی کہ وہ فارم اسٹے کے نمبر پر فون کرنے کے بجائے واٹس ایپ کے ذریعے رابطہ کریں تاکہ انتظامیہ کے لیے پیغامات اور بکنگز کو سنبھالنا آسان ہوسکے۔مالینی نے یہ بھی بتایا کہ ان کے انسٹاگرام اکاؤنٹ پر بھی بڑی تعداد میں پیغامات موصول ہورہے ہیں۔ انہوں نے کہا کہ ’’کوشش کروں گی کہ کم از کم ایک مرتبہ ہر شخص کو جواب دے سکوں۔‘‘
