کراچی( شوبز ڈیسک)پاکستانی ٹی وی میزبان، اداکارہ اور سوشل میڈیا شخصیت متھیرا نے پہلی بار اپنی عمر اور کاسمیٹک طریقۂ علاج سے متعلق کھل کر اظہار خیال کرتے ہوئے کہا ہے کہ وہ اپنی شخصیت، عمر اور زندگی کے ہر مرحلے پر مکمل اعتماد رکھتی ہیں۔ایک حالیہ پوڈکاسٹ میں گفتگو کرتے ہوئے متھیرا نے بتایا کہ ان کی عمر 34 برس ہے۔ انہوں نے کہا کہ وہ ہر معاملے میں سچ بولنے کو ترجیح دیتی ہیں اور اپنی عمر چھپانے کی ضرورت محسوس نہیں کرتیں۔ ان کے بقول انسان ہمیشہ جوان نہیں رہ سکتا، اس لیے بڑھتی عمر کو فطری حقیقت سمجھ کر قبول کرنا چاہیے۔متھیرا نے کہا کہ شہرت ہر کسی کے نصیب میں نہیں ہوتی اور انہیں بھی کسی نے متعارف نہیں کرایا بلکہ انہوں نے اپنی محنت سے اپنی شناخت بنائی۔ ان کا کہنا تھا کہ اسی وجہ سے نہ انہیں مستقبل کی فکر ہے اور نہ ہی عمر بڑھنے کا خوف۔ انہوں نے مزید کہا کہ اگرچہ وہ عوامی شخصیت ہیں، تاہم اپنی نجی زندگی کو ذاتی رکھنا پسند کرتی ہیں، جبکہ وزن یا ظاہری شکل سے متعلق تنقید بھی انہیں متاثر نہیں کرتی۔اداکارہ نے یہ بھی انکشاف کیا کہ انہوں نے چند کاسمیٹک طریقۂ علاج کروا رکھے ہیں۔ ان کے مطابق ایک حادثے میں ناک کی ہڈی متاثر ہونے کے بعد انہوں نے ترکی میں ناک کی سرجری کرائی، جبکہ وہ وقتاً فوقتاً معمولی مقدار میں فلرز اور بوٹوکس بھی استعمال کراتی ہیں۔
