لاہور( شوبز ڈیسک) اداکارہ اور مصنفہ مہر بانو کی دوستوں کے ساتھ بنائی گئی ایک ریل سوشل میڈیا پر وائرل ہوگئی، تاہم ویڈیو کے موضوع پر صارفین کی جانب سے شدید تنقید کی جا رہی ہے۔مہر بانو، جنہوں نے چند برس قبل ڈراموں اور فلموں کے ذریعے شوبز میں قدم رکھا، ان دنوں شمالی علاقوں کی سیر پر ہیں۔ اسی دوران انہوں نے دوستوں کے ساتھ ایک مزاحیہ انداز کی ریل تیار کی۔وائرل ویڈیو میں مہر بانو اور ان کے دوستوں نے ایک فرضی منظر فلمایا، جس میں اداکارہ کی موت کا تاثر دیا گیا۔ ویڈیو کو نیوز رپورٹنگ کے انداز میں پیش کیا گیا، جبکہ ان کے دوست رپورٹرز اور اہل خانہ کے کردار ادا کرتے دکھائی دیے۔ویڈیو میں یہ تاثر دیا گیا کہ سفر کے دوران اداکارہ انتقال کر گئی ہیں، جس کے باعث اہل خانہ کی چھٹیاں بھی متاثر ہوئیں۔ریل وائرل ہونے کے بعد سوشل میڈیا پر متعدد صارفین نے اسے نامناسب قرار دیتے ہوئے کہا کہ موت جیسے حساس موضوع کو تفریح یا مزاح کا ذریعہ نہیں بنانا چاہیے، جبکہ کئی افراد نے ویڈیو پر ناپسندیدگی کا اظہار کیا۔
