لاہور ( سپورٹس ڈیسک)پاکستان کرکٹ ٹیم کے ہیڈ کوچ مائیک ہیسن نے کہا ہے کہ صاحبزادہ فرحان اپنی کپتانی کی ذمہ داری سے لطف اندوز ہو رہے ہیں اور وقت کے ساتھ ان کی قائدانہ صلاحیتوں میں مزید بہتری آئے گی۔ ان کا کہنا تھا کہ پاکستان نے سری لنکا کے خلاف ٹی ٹوئنٹی سیریز میں تبدیلیاں کرتے ہوئے اپنی بہترین کرکٹ کھیلنے کی کوشش کی۔راولپنڈی میں سیریز کے تیسرے اور آخری ٹی ٹوئنٹی میچ میں شکست کے بعد پریس کانفرنس کرتے ہوئے مائیک ہیسن نے کہا کہ پاکستان گزشتہ ڈیڑھ سال سے ٹی ٹوئنٹی سیریز جیتتا آ رہا ہے، جبکہ حالیہ عرصے میں ٹیم کی کامیابیوں میں مڈل آرڈر کے بلے بازوں نے نمایاں کردار ادا کیا ہے۔صاحبزادہ فرحان کی کپتانی کے حوالے سے ہیڈ کوچ کا کہنا تھا کہ وہ کھیل کو اچھی طرح سمجھتے ہیں اور ان کی قیادت میں وقت کے ساتھ مزید نکھار آئے گا۔ انہوں نے کہا کہ صاحبزادہ فرحان کپتانی کی ذمہ داری سے محظوظ ہو رہے ہیں۔سری لنکا کے خلاف آخری میچ میں پاکستان کو آٹھ وکٹوں سے شکست پر مائیک ہیسن نے اعتراف کیا کہ ٹیم کی باؤلنگ مطلوبہ معیار کے مطابق نہیں تھی۔ ان کا کہنا تھا کہ پاکستان کرکٹ ہمیشہ اپنے تیز رفتار گیند بازوں کی وجہ سے پہچانی جاتی رہی ہے، اسی لیے شان ٹیٹ پاکستانی فاسٹ باؤلرز کے ساتھ کام کریں گے۔آئندہ ون ڈے بین الاقوامی سہ ملکی سیریز کے بارے میں بات کرتے ہوئے ہیڈ کوچ نے کہا کہ پاکستان کے ون ڈے اسکواڈ نے حالیہ عرصے میں اپنی کارکردگی بہتر بنائی ہے۔ تاہم، انہوں نے خبردار کیا کہ انگلینڈ عالمی درجہ بندی میں پہلے نمبر پر موجود ٹیم ہے، اس لیے سہ ملکی سیریز ایک سخت امتحان ثابت ہوگی۔
