لاہور( شوبز ڈیسک)پاکستان کی سابق اداکارہ و ٹی وی میزبان مشی خان نے فریال گوہر کے اپنے سابق شوہر سے متعلق دعوؤں پر اداکارہ کو ہی تنقید کا نشانہ بنا دیا۔سوشل میڈیا پر سامنے آنے والے مختلف مسائل پر گفتگو کرنے والی مشی خان نے حال ہی میں اپنی ایک ویڈیو میں فریال گوہر کے وائرل ہونے والے کلپس پر بات کی۔سابق اداکارہ نے کہا کہ ’’فریال گوہر صاحبہ بہت ہی شاندار انسان ہیں، انہیں ہم نے چند عرصہ قبل سابق شوہر کے ساتھ ایک شو میں دیکھا تھا، جس میں ایسا محسوس ہورہا تھا کہ ان کے تعلقات بہت ہی دوستانہ ہیں۔‘‘مشی خان نے کہا کہ ’’اس شو میں فریال صاحبہ نے یہ بھی بتایا تھا کہ میری سابقہ ساس سے اچھے تعلقات ہیں اور میں ان سے ملاقات کرتی رہتی ہوں، اب وہ اسی شو میں اکیلی آئیں اور تقریباً 30 سے 35 سال قبل ہونے والے تشدد کی باتیں دہرائیں۔‘‘ان کا کہنا تھا کہ ’’اتنے عرصے بعد یہ سب باتیں کرنے کا کوئی مطلب نہیں اور میرا سوال یہ ہے کہ اگر آپ کے ساتھ کسی آدمی نے اس قسم کا بہیمانہ تشدد کیا تھا اور آپ اسی آدمی کے ساتھ پچھلے پروگرام میں بیٹھ کر کافی ہنسی مذاق کررہی تھیں۔‘‘
