ملتان( سپورٹس ڈیسک) پاکستان کے لیفٹ آرم اسپنر محمد نواز دائیں ہاتھ کی درمیانی انگلی میں فریکچر کے باعث نیشنل چیمپئنز کپ سے باہر ہوگئے۔پاکستان کرکٹ بورڈ (پی سی بی) کے مطابق اسکین کے بعد محمد نواز کی انگلی میں فریکچر کی تصدیق ہوئی ہے، جس کے باعث وہ کم از کم تین ہفتوں تک کرکٹ سے دور رہیں گے۔محمد نواز کو یہ انجری 12 اگست کو ملتان کرکٹ اسٹیڈیم میں پاکستان بلوز کے خلاف میچ کے دوران فیلڈنگ کرتے ہوئے پیش آئی۔ انجری کے باوجود انہوں نے میچ میں اپنے 10 اوورز مکمل کیے، تاہم پاکستان گولڈ کو 6 وکٹوں سے شکست کا سامنا کرنا پڑا۔پی سی بی کے مطابق انجری کے دو ہفتے مکمل ہونے کے بعد محمد نواز اسپورٹس اینڈ ایکسرسائز میڈیسن ڈیپارٹمنٹ میں رپورٹ کریں گے، جہاں طبی نگرانی میں ان کی کنڈیشننگ اور دوبارہ کھیلنے کا پروٹوکول طے کیا جائے گا۔
