لاہور( شو بز ڈیسک)پاکستانی اداکارہ مومنہ اقبال نے رکن پنجاب اسمبلی ثاقب چدھڑ کے ساتھ جاری تنازع پر پہلی بار تفصیلی مؤقف سامنے لاتے ہوئے ان پر ہراسانی، بلیک میلنگ اور دھمکیاں دینے کے الزامات عائد کیے ہیں۔صحافی ارشاد بھٹی کو دیے گئے حالیہ انٹرویو میں مومنہ اقبال نے دعویٰ کیا کہ انہیں مبینہ طور پر نجی تصاویر اور ذاتی مواد سماجی ذرائع ابلاغ پر نشر کرنے کی دھمکیاں دی جارہی تھیں، جس کے باعث وہ اپنی عزت اور نجی زندگی کے حوالے سے شدید خوف میں مبتلا تھیں۔اداکارہ کے مطابق ثاقب چدھڑ جب ان کے گھر رشتہ لے کر آئے تو ان کے والد نے فوری رضامندی دینے کے بجائے کچھ وقت مانگا۔ مومنہ اقبال نے دعویٰ کیا کہ چند ماہ بعد انہیں ثاقب کی پہلی اہلیہ کے پیغامات موصول ہونا شروع ہوئے، جن سے انہیں ان کی شادی شدہ ہونے کا علم ہوا۔مومنہ اقبال نے مزید دعویٰ کیا کہ ثاقب چدھڑ کو امید تھی کہ پیدا ہونے والے حالات اور دباؤ کے باعث ان کے منگیتر حمزہ ان کا ساتھ چھوڑ دیں گے، تاہم ایسا نہیں ہوا اور حمزہ مشکل صورتحال میں ان کے ساتھ موجود رہے۔
