لاہور( شوبز ڈیسک) اداکارہ مومنہ اقبال کو مبینہ طور پر ہراساں کرنے اور جان سے مارنے کی دھمکیوں کے مقدمے میں عدالت نے ثاقب چدھڑ اور ان کی اہلیہ سمیرا کی عبوری ضمانت میں توسیع کر دی ہے۔لاہور کی سیشن کورٹ میں ایڈیشنل اینڈ سیشن جج نصرت علی صدیقی نے مقدمے کی سماعت کی۔ اس موقع پر ثاقب چدھڑ اپنی اہلیہ کے ہمراہ عدالت میں پیش ہوئے۔عدالت نے ملزمان کی عبوری ضمانت میں 28 جولائی تک توسیع کرتے ہوئے آئندہ سماعت تک ضمانت برقرار رکھنے کا حکم دیا۔سماعت کے دوران تفتیشی افسر نے عدالت کو بتایا کہ ثاقب چدھڑ کی اہلیہ سمیرا تفتیش میں شامل ہو چکی ہیں، جبکہ مقدمے کی مکمل تفتیش کے لیے مزید وقت درکار ہے۔واضح رہے کہ این سی سی آئی اے نے اداکارہ مومنہ اقبال کی درخواست پر یہ مقدمہ درج کر رکھا ہے، جس میں ہراسانی اور جان سے مارنے کی دھمکیوں کے الزامات شامل ہیں۔
